ღვთაებრივი მატრიცა

რა მოხდებოდა, თუკი სამყარო იმაზე გაცილებით მჭიდროდ იქნებოდა
დაკავშირებული ჩვენთან, ვიდრე წარმოგვიდგენია? თუკი ჩვენს აზრებს,
ემოციებსა და რწმენას არა მხოლოდ ჩვენს შინაგან არსზე, არამედ რეალობის
აღქმაზეც შეეძლო გავლენის მოხდენა? იქნებ ადამიანი მხოლოდ სამყაროს
დამკვირვებელი კი არა, მისი შემოქმედებითი პროცესის მონაწილეც არის?
გრეგ ბრეიდენი წიგნში „ღვთაებრივი მატრიცა“ მკითხველს რეალობასა და
ადამიანის ურთიერთკავშირის უჩვეულო ხედვას სთავაზობს. ავტორი
ერთმანეთთან აკავშირებს კვანტური ფიზიკის იდეებს, უძველეს სულიერ
ცოდნასა და ადამიანის ცნობიერების შესაძლებლობებს; ამასთან ცდილობს,
ახსნას, როგორ შეიძლება ყველაფერი ურთიერთდაკავშირებული იყოს ერთიან,
უხილავ ქსელში – იმ მატრიცაში, რომელიც ყოველივეს არსებობასა და ადამიანის
გამოცდილებას აერთიანებს.
ბრეიდენი ამ იდეას ფიზიკასა და სულიერებას შორის ერთგვარი ხიდის
სახით წარმოგვიდგენს. კვანტური ფიზიკის პოპულარულ ინტერპრეტაციებზე
დაყრდნობით, იგი განიხილავს ადამიანის როლს რეალობის აღქმასა და
ფორმირებაში. ავტორის ხედვით, ჩვენი აზრები, ემოციები და რწმენა
მნიშვნელოვან გავლენას ახდენს იმაზე, თუ როგორ აღვიქვამთ სინამდვილეს და
როგორ ვქმნით საკუთარ ცხოვრებისეულ გამოცდილებას.

წიგნის ერთ-ერთი მთავარი გზავნილი ადამიანის შინაგან სამყაროს
უკავშირდება: ჩვენს აზრებს, ემოციებსა და რწმენას, შესაძლოა, იმაზე დიდი
მნიშვნელობა ჰქონდეს, ვიდრე ერთი შეხედვით ჩანს. ამასთან ბრეიდენი
გვიბიძგებს, დავფიქრდეთ, რამდენად შეუძლია სიყვარულს, თანაგრძნობასა და
შინაგან განზრახვას შეცვალოს ჩვენი დამოკიდებულება საკუთარი თავისა და
გარემომცველი რეალობის მიმართ.
„ღვთაებრივი მატრიცა“ მკითხველს ინტელექტუალური და სულიერი
მოგზაურობისკენ იწვევს, იმ უხილავ განზომილებათა აღმოსაჩენად, რომელთა
შესახებაც კაცობრიობა საუკუნეების განმავლობაში სვამდა კითხვებს.
შესაძლოა, პასუხები ბევრად უფრო ახლოს იყოს, ვიდრე გვგონია.
შესაძლოა, სამყაროს შეცნობა სწორედ საკუთარი თავის შეცნობით იწყება...