ანარეკლი - პანდემიის გეშტალტური დღიურები

გამომცემლობა „წიგნი+ერი“ წარმოგიდგენთ ფსიქოლოგისა და გეშტალტთერაპევტის ლიკა წერეთლის წიგნს „ანარეკლი. პანდემიის გეშტალტური დღიურები“. ეს წიგნი ფსიქოლოგიური რესურსების ნაკრებია: შინაგანი საყრდენები, ოთახებიდან სიმწვანეში გაჭრილი ფანჯრები და სამყაროსთან დამაკავშირებელი ხიდები, რომლებიც არა მხოლოდ პანდემიურ ფონშია აქტუალური, არამედ მთელი თქვენი ცხოვრების საინტერესო მეგზურად იქცევა.

თქვენ შეძლებთ:

•  განწყობის შეცვლას;

•  შინაგანი, უხილავი რესურსების გააქტიურებას;

• იმის შეგრძნებას, თუ როგორ მოქმედებენ გეშტალტთერაპიულ ჭრილში მეტაფორული ბარათები და იუნგის მიერ ფსიქოლოგიაში შემოტანილი ტაროს კარტები, რომელიც დიდმა ფსიქოლოგმა კოლექტიურ არაცნობიერსა და არქეტიპებს დაუკავშირა.

ლიკა წერეთელი პირველი განათლებით გერმანისტია, რომელმაც შემდგომ ფსიქოლოგიის სფეროში გადაინაცვლა და გეშტალტთერაპიაში ევროპული აკრედიტაცია მოიპოვა. თავად ავტორი ტაროს კარტის მიმართ ინტერესსა და მის თერაპიულ პროცესში შემოტანას თავის ფილოლოგიურ ფესვებს უკავშირებს, კერძოდ, ანალოგიას გრაალის მაძიებლის გზასთან, რომელსაც ტაროს კარტების 22 უფროსი არკანი ძალზე თავისებურად ასახავს.